ఏపీ కాంగ్రెస్ చీఫ్ వైఎస్ షర్మిలకు రాజ్యసభ సీటు?

ఆంధ్రప్రదేశ్ కాంగ్రెస్ కమిటీ (ఏపీసీసీ) అధ్యక్షురాలు వైఎస్ షర్మిలకు రాజ్యసభ సీటు ఇస్తామని గతంలో కాంగ్రెస్ అగ్రనేత రాహుల్ గాంధీ ఇచ్చిన హామీ ఇప్పుడు నెరవేరే అవకాశాలు కనిపిస్తున్నాయి. కర్ణాటక రాష్ట్రంలో కాంగ్రెస్ పార్టీకి లభించే మూడు రాజ్యసభ స్థానాలకు గాను వైఎస్ షర్మిల పేరును అధిష్ఠానం ప్రముఖంగా పరిశీలిస్తున్నట్లు తెలుస్తోంది. రాహుల్ గాంధీ స్వయంగా ఇచ్చిన మాట ప్రకారం ఆమెను కర్ణాటక కోటా నుంచి ఎగువసభకు పంపించేందుకు ఢిల్లీ స్థాయిలో జోరుగా కసరత్తు సాగుతోంది.

ఈ స్థానాల కోసం కర్ణాటక స్థానిక నేతలైన బీకే హరిప్రసాద్, రాజీవ్ గౌడ పేర్లు ప్రముఖంగా వినపడుతుండగా, కేంద్ర స్థాయి నుంచి కాంగ్రెస్ అధికార ప్రతినిధులు పవన్ ఖేడా, సుప్రియా శ్రీనటేల పేర్లను కూడా పార్టీ నాయకత్వం పరిశీలిస్తోంది. వీరితో పాటు వైఎస్ షర్మిల పేరు కూడా ఈ జాబితాలో చేరడం ఇప్పుడు రాజకీయ వర్గాల్లో అత్యంత ప్రాధాన్యం సంతరించుకుంది.

మరోవైపు, ఆంధ్రప్రదేశ్ కోటాలో ఇప్పటి వరకు వైఎస్సార్సీపీ రాజ్యసభ ఎంపీగా ప్రాతినిధ్యం వహించిన రిలయన్స్ ప్రతినిధి పరిమళ నత్వానీ పదవీకాలం ముగిసింది. దీంతో ఆయన మళ్లీ ఝార్ఖండ్ రాష్ట్రం నుంచి ఎగువసభకు ఎన్నికయ్యేందుకు సిద్ధమవుతున్నట్లు సమాచారం. గతంలో ఝార్ఖండ్ నుంచి రెండు పర్యాయాలు స్వతంత్ర అభ్యర్థిగా విజయం సాధించిన నత్వానీ, ఈ విడతలో మాత్రం భారతీయ జనతా పార్టీ (బీజేపీ) అభ్యర్థిగా పోటీ చేసేందుకు సన్నాహాలు చేసుకుంటున్నారు.

ఇదే సమయంలో ఝార్ఖండ్‌లో ఖాళీ అయిన రెండు రాజ్యసభ స్థానాల్లో ఒకదానికి జేఎంఎం అధినేత కుటుంబం నుంచి ఒక మహిళా సభ్యురాలిని బరిలోకి దించే అవకాశాలు కనిపిస్తున్నాయి. ఇక్కడి రెండో స్థానాన్ని దక్కించుకోవాలని కాంగ్రెస్ పార్టీ ఆశిస్తున్నప్పటికీ, ఆ పార్టీకి ఉన్న 16 మంది శాసనసభ్యుల బలం సరిపోవడం లేదు. ఝార్ఖండ్‌లో ఒక రాజ్యసభ సీటు గెలవాలంటే కనీసం 24 మంది ఎమ్మెల్యేల మద్దతు అవసరం కావడంతో ఇక్కడ కాంగ్రెస్‌కు సాంకేతిక సమీకరణాలు ప్రతిబంధకంగా మారాయి.